「商」人

你問我，我想唔想做呢行？

我想。

再問我，識唔識做呢行？

唔識。

我唔識做，但係唔代表我要將呢個機會白白浪費，我唔試過做，永遠唔會知道自己處於咩水平。

與其擔心，倒不如勇敢面對，好好享受呢段唔知會持續幾耐日子。

畢竟，唔係好多人可以做到自己想做工作，我知道自己有幾幸運。

感謝上帝！我終於成為「商」人。

仙境

一向甚少流連煙酒之地，對於酒只僅僅認識各種啤酒黑啤燒酒以至屋企唯一一支Macallan，但自從上次去Manchester，邂逅到樓上個杯野之後，自此對酒開始有新睇法。

呢杯野叫Sangria，Sang呢個字除左同我有莫大關係之外，西班牙文、法文入面都可以解做血，見到杯野就知點解要改呢個名。Sangria可以話係西班牙國酒，每間西班牙餐廳都會有，配料可能有多少唔同，但主要由紅酒、白蘭地、切粒/片生果混合而成，入口容易，深受少男少女歡迎，不過唔好覺得好飲就係咁飲，因為酒精含量極高，只係入口唔覺，女士們緊記小心。

香港只有一d西班牙、南歐餐廳或者大間dpub先有得飲，好多酒莊、大型超市都無得賣，點知今晚走入某間連鎖快餐店食晚飯，竟然比我見到佢！不過黎得呢d快餐店，都知佢肯定唔好飲，加上要迎合大眾，應該無咩酒精成份。我特登留意佢點沖，見到佢將大量冰塊同水倒入杯，然後再由雪櫃拎出一個裝有紅色色素同生果碎盒，倒落隻杯度，攪兩下，上檯。我即刻試一口，然後再無飲過第二口。

只係因為個名，我明知佢會令人失望都照飲，所以你話改名係幾咁重要。話時話，中文有d人將Sangria譯作血紅雞尾酒，我覺得呢個名麻麻，反而我覺得香格理拉幾趁佢，有音譯，又可以令人感覺置身香格理拉仙境之中，好，我從始叫你做香格理拉，下次試下咁叫，睇下有無人唔明。