百萬富翁

無疑，的確係套幾好睇戲，節奏明快，情節淺白，配樂亦都名不虛傳，將我以往唔太喜歡印度音樂黎個大改變，配合主角動態、心情，令人聽得暢快，睇得投入。戲入面貧民窟實境令人印象難忘，生活條件惡劣，真係隨時死左都無人知，令我諗起City of God呢套戲，分別只係City of God更直接、更暴力。

之但係，我又覺得未至於係最佳影片，講啟發性蝙蝠俠大得多，講戲味又唔及自傳式Milk，唔通真係有政治因素：希望借一部講逆境自強電影去配合返美國、以至全球環境？

睇戲時，大家不妨留意週圍有無多左人做主角，同Jamal一齊玩百萬富翁，我隔離正正有對參加者，不停騷擾，專心到我"殊"佢兩次都完全唔知，可見百萬富翁熱潮隨時可以再現。建議亞視攪完大龍鳳後，即刻搵返陳啟泰再主持百萬富翁，大學生人工得四千情況下，反應肯定熱烈，收視升。

問號

財 政 司 司 長 曾 俊 華 表 示 ， 為 大 學 生 提 供 實 習 培 訓 ， 讓 學 生 在 未 找 到 工 作 前 ， 體 驗 工 作 情 況 ， 或 者 有 機 會 對 內 地 企 業 ， 長 遠 而 言 對 大 學 生 是 好 事 ， 希 望 大 學 生 不 要 斤 斤 計 較 ， 即 使 沒 有 人 工 亦 應 去 做 。

司長，我完全唔明你咩意思。我係一個人，要生活要食飯要搭車，呢d係基本要求，咁樣叫做斤斤計較？

唔收人工？不如你都唔好收喇。

再次証明呢班所謂高官只係活自己世界，以為個個畢業生屋企大把，可以一邊經驗一邊學野，佢地知唔知大把人要還grant loan，又要養家？大學生都咁，中七點算？中五又點算？點解你要增加d商家議價能力？

呢篇野好多問號，同樣，我個腦入面都有千萬個問號，理解唔到呢班人諗咩，管財經事務可以唔知咩係迷債，管錢叫人唔好收錢。

好可悲，作為一個即將畢業學生，我真係欲哭無淚。我開始明白，點解咁多人寧願咩都唔做綜援，想打工靠自己會無人工，咩都唔做攤屋企反而有錢收，呢個係咩社會現象？

時勢唔好，人會渴望有英雄出現，我彷彿見到一個俠士走入大學，住武器，將大學生一個一個殺死......

高手

所謂大隱隱於市，香港呢個細細彈丸之地，其實隱藏左好多高人。





如果真係出呢d yes card，應該好買得。

曇花一現

隨著倫敦大雪緩和，英超冬季轉會窗亦都正式關閉。

曼城大灑金錢，當然條箇中焦點，但係熱刺亦唔執輸，買入唔少人，而且大多都曾經踢過熱刺，換句話說，係食回頭草。咁多棵草之中，又以羅比堅尼最受注目，僅僅轉去利物浦半年，立刻又重投熱刺，極具戲劇性。有d野真係整定，睇黎羅比堅尼始終唔可以踢大會。

出場機會唔多，入球自然少，但係我忽然發覺，原來我親眼見證過曇花開花一刻，有幸現場睇住羅比堅尼射入踢利物浦第一球。



羅比堅尼，因為呢一晚實在太難忘，所以我唔會唔記得你踢過利物浦。離開唔係代表你無能力，我始於覺得有問題唔係你，係賓尼迪斯。

我有新歡

成日有人同我講：「小心七年之癢！」

每次聽完之後，我都當係耳邊風，聽完就算，所以我點都無諗過會有咁一日。

我承認，我對佢生厭。

眼見身邊個個換畫，我都一直堅持，但係見到其他人換左之後，開心好多，連心情都開朗d，我都開始有動搖，到左最近，各種客觀主觀因素之下，我終於下定決心。

請唔好怪我貪新鮮，你一日比一日殘，我最初都忍受到，但係當新野不斷出現，我地之間感情，已經開始磨滅。對唔住，話哂對左咁多年，我講野唔應該太過份，我應承你，我會好好努力，多謝你過往幾年幫助，令到我可以更加了解個世界，更加明白自己。

再見了...



你服務左我咁多年，希望你可以用你剩餘價值幫助其他人。