旅行的意義

其實我都唔知點解自己會咁鍾意英國。喺好多香港人眼中，英國係個又濕又凍、年中無幾日見到陽光嘅地方，除左97前統治過香港之外，似乎同香港人拉唔上太多關係。

殖民情意結？其實就算有，都唔會太多，回歸個陣先剛剛form 1，仲發緊夢，成舊飯咁，對英國印象只有英超同英女皇壽辰，同埋覺得戴安娜皇妃好靚，就係咁多。懂事之後，識野多左，眼界闊左，發覺英國好多野都仲深深影響住香港，而且正因為咁，香港先可以國際知名，呢點我地無得唔認，但係咁都唔係鍾意英國嘅原因。

可能係因為有緣。2003年，學校本來有個交流團去澳洲，點知忽然殺出沙士呢個程咬金，攪到計劃胎死腹中，但係個股去旅行嘅熱情一直無消失。年幾之後，唔知咩原因，Winnie忽然提議去英國旅行，對於一個學生黎講，去歐洲係件好遙遠嘅事，但係咁啱當時一直做緊馬會兼職，加上阿媽預我去澳洲筆錢仲喺度，就咁，無啦啦去左英國。到左上年，因為Winnie個degree規定必須要去外地讀一個學期，英國、澳洲、加拿大三個地方，Winnie偏偏去左英國，仲要係北部嘅Durham，一個令到佢非常鍾意嘅地方。亦因為咁，我喺佢學期完個陣再飛去英國搵佢，順便去埋歐洲其他地方玩，就係咁，我去左兩次英國。

Winnie不斷同我分享英國北部嘅野，但我兩次去英國都限於中部及南部活動，無去北邊，所以我都只可以得個聽字，再睇下d相。但係世事往往出乎意料，唔夠一年之後，我竟然得到一個極其難得嘅機會，令我可以去到英國北部，親身體驗一下當地生活(上面d相就係曼徹斯特同利物浦)，將Winnie同我分享嘅野具體化。果然，北部同南部完全唔同，我亦漸漸明白Winnie點解咁鍾意北邊，因為，我都一樣，鍾意北邊多過南邊。我唔知咩原因，但係我同Winnie先後因為各種原因去過英國，而且體會到大家嘅感受，我深信，英國呢個地方對我地非常重要，可能仲有更多野等緊我地去發掘都未定。

我講真架，可以嘅話，我真係想移民去英國。

假謙虛

相信大家由細到大，都曾經對某d廣告留有深刻印象，我都唔例外。近幾個月，有線經常播放一個旅遊廣告，廣告屬於一間本地自助旅行社，令我留下好深印象，特別差嘅印象，大家不妨睇睇：

可能你睇完覺得無乜野，但係我好唔鍾意裡面個VO嘅態度同語氣，明明已經幫你將自遊行當中最重要嘅機票、住宿等等全部安排好，點解仲要表達呢個態度：「其實我地只係幫左你好少，剩係機票同住宿喳。」既然幫左大忙，點解仲要扮謙、扮無功勞？

電視剛剛又播左次，真係愈聽愈討厭。

足球外的巴塞隆拿

有時睇Woody Allen嘅戲真係幾麻煩，好似明，但係又覺得有d地方好奇怪，諗完仲唔明，一個男人加三個女人，本來已經複雜，加埋Woody Allen本身嘅諗法入去就更難明。

配樂出色，巴塞隆拿景色一流，只係劇情有d唔知想點。Cristina一段我明白，愛未必講性別性格語言，互相補助嘅關係可能更加重要。

但係Vicky一段我真係唔明，女人生活平淡，想搵人帶佢逃出生天，所以背叛未婚夫而出軌，呢度唔難理解。問題係，我完全睇唔到個男人做過咩就可以當街成功勾引一個人妻野戰，吹水、帶團、食飯、聽音樂，全部最普通不過嘅活動，但係Vicky去到食飯個陣已經開始唔理未婚夫，最後一個結他攪掂完事，咁佢撞到林一峰咪死？十足中學時代某d追女仔game，只要滿足某幾個條件就可以成功上床。

Woody Allen都係男人，所以明白同類個腦諗咩，無論音樂家、藝術家、導演、作家，一個男人幾有內涵都好，無喇喇識陌生女仔都只有一個終極目標，再次証明我一直嘅理論完全正確。不過我幾欣賞男主角嘅直接，起碼佢諗到咩就講咩，開口就問上唔上床，毫無掩飾。我更加feel到，當兩個女主角先後因唔同理由離開個陣，佢係暗暗叫好。

始終，男人個腦唔喺上面，喺下面。

或者Woody Allen想講人有無勇氣去改變現狀，但我根本唔認為人會完全知道自己想要咩，Elena講得好，根本就係長期慢性不安於現狀。如果因為要順從自己心意而去傷害其他人，呢種叫自私，我完全接受唔到呢種價值觀，更加覺得咁樣反而係懦弱。始終人鍾意睇自己失去乜野，即使Vicky放棄未婚夫跟男主角走，佢將來都會有一日又想改變，到嗰陣，佢又可能後悔點解因為一時快感而放棄安穩生活。嗰下鎗聲將佢拉返現實，放棄巴塞隆拿，但係機場一幕又睇到佢好似想留低，可見佢根本唔知自己想點。

有時人生就好似一場又一場賭博，你可以選擇有勇氣地將注碼放上去，但係唔該輸左唔好喊，更加唔好話後悔。

血統

毛澤東同蔣介石係中國現代史上嘅重要人物，兩位人兄相繼離世，佢地嘅家族亦漸漸遠離大家嘅視線。現代資訊科技發達，孔子、諸葛亮等等後代都搵到出黎，毛、蔣兩人嘅後代就更容易搵到，最近就喺網上見到佢地嘅孫個樣...





















上邊係蔣介石孫蔣友柏，下面係毛澤東孫毛新宇...

從外表上睇，蔣家仍然可以維持優良血統，一臉英氣，加上留學美國紐約大學，蔣家名聲仍在；至於毛家可能因為係中共功勳關係，世代受到尊崇，生活條件優越之下，毛家後代已變得甚有福份，神奇到男人都可以大肚...

如果蔣介石同毛澤東泉下相會，蔣介石應該笑得好開心，報返一戰之仇。

天譴

神州大地，奇人奇事極多，最近，又有一單趣聞發生。

江西男子指天發誓後遭雷擊 (明報)10月14日 星期二 16:40

江西一男子指天發毒誓，轉身就遭電擊。因搶救及時，男子目前已脫離生命危險。 十三日上午，吉安縣黃某找到家住井岡山大市場的男子涂某稱，三年前一名朋友結婚時，涂某曾讓他代送了三百元禮金，此後涂某將此事遺忘一直未還錢。涂某聽後稱沒有此事。於是，黃某便對涂某說，如果涂某敢對天發誓，他就不要這錢了。 涂某聽後，走到門前指天發誓說，若欠了黃某的錢，他就遭天打雷劈或觸電死，黃某見狀就走了。 但五分鐘後，當涂某洗完米用電飯煲煮飯時，因未擦乾手上的水，手剛一碰到電飯煲插頭上已老化的電線，就被電擊倒在地，不能動彈。 所幸涂某的兒子此時放學回家，發現後趕緊報警。民警趕到後，立即將涂某送往醫院。 （中通社）

所以，誓都係唔好亂發，雖然個天無直接劈你，但係我相信雷電同家用電係近親，佢地肯定有聯絡。好一招曲線劈友。

金句王黎明

黎明一向被譽為娛樂圈中的金句王，經常發表一些令人拍案叫絕的言論，

繼「唔可以空肚食早餐」同埋「左手係肉，手背又係肉」之後，今次連佢嘅新歌都玩埋一份，歌名叫做：

夏天的味道(秋天版)

真係無負金句王之名。

叔叔鬧你

假期前夕，大量邨民光顧郵局，為方便顧客，郵局採取分流措施，左邊隊伍交電費水費，右邊隊伍處理收發郵件。我要寄東西到外地，自然排在右邊隊伍。

由於排最前面嘅女士似乎想將屋企所有固體寄出，所以一排就近半個鐘頭。期間，我前面的另一位女士一邊排隊，一邊照顧坐在BB車上的小朋友。小朋友約莫三、四歲，輪候期間忽然大喊大叫，那位女士本來不予理會，點知小朋友愈喊愈勁。

終於，那位女士望一望窗後面位郵局職員，然後同小朋友講：「你再嘈，叔叔就鬧你！」

小朋友轉頭望左我一眼，然後隨即收聲。

我同個小朋友一樣，都即刻靜左。

夢工場

親到奧脫福，表面上冷靜，實質內心雀躍不已。


大恩不言謝，能夠有這樣的一趟旅程，我亦無話可說了。


興奮過後，又要重投正常生活，但我一定會為那留下的尾巴，刻上完滿的句號。


等我，我一定會再來，在場內搖著頸巾、唱著歌曲，為紅魔鬼尖叫喝采。