成也謝拉特，敗也謝拉特

謝拉特，多謝你！因為你嘅衝動，曼聯有機重後趕上。

呢單野仲未明朗，但好有可能成為今屆英超嘅轉捩點。

神奇隊長今次會唔會調返轉，由利記救世主變成罪人？拭目以待。

新一頁

又一個新開始！

由曼聯嘅皇牌7號、到皇馬同銀河嘅23號，碧咸個波衫號碼一直都係全世界人嘅焦點，每個號碼都有特別意義。

今次借去AC米蘭，佢反而一反常態，揀左個無咩特別嘅32號。記者問佢原因，佢只係淡淡咁話：「因為呢個係球會比我嘅第一個號碼。」

可能，碧咸真係已經洗盡鉛華，心態都開始改變，一心只係想繼續為國出力。

作為一個多年嘅曼聯人，衷心祝福你！

Why so serious?

上星期分手，今個星期話結婚，呢個世界真係得意，仲有咩係無可能？

我忽然間諗起呢位仁兄嘅說話...



"Let's put a smile on that face！And......why so serious?"

世界變得太快，有時候，真係笑下就算，唔駛太上心。

Dayo

雖然話時代變得好快，但係有d野始終經得起時間考驗，而家睇返，一樣好到：



黃子華，不枉我鍾意睇你。

The Wiki of King

仲記得大約十幾日前，個朝因為太肚餓，食左王維基個維字，將佢高調入主拯救亞視稱為「王維新」。炒左一班高層，出哂新宣傳片，點知兩個禮拜唔夠，就突然辭職。光緒維新都有百日，點知「王維新」只有十零日。講真，當見到佢大大聲話亞視唔會變大陸台，又兜口兜面問d亞姐個胸真定假個陣，我真係對佢有d期望，諗亞視係咪真係有新變化。

其實到左呢個地步，亞視都已經玩完，似乎做咩都無用，倒不如真係玩盡d，直頭搵台柱陳啓泰、黃麗梅等等做埋高層，負責統籌所有節目，可能反而置諸死地而後生。

唔係講笑，每次見到阿麗梅d衣著打扮，無論我有幾唔開心都笑返，可能佢真係救到亞視。

麗梅，我支持妳。

-----------------------------------------------------------------
晚上十點，王維基發表聲明話無主動辭職。正，黑澤明套<<羅生門>>又有得睇！

Mike

每段關係都會有一d代表性或者象徵意義嘅野，尤其係愛情，能夠代表嘅野就更多。我同Winnie都一樣，都有d野可以代表我地嘅感情，最具代表性嘅莫過於佢...



呢位小朋友叫Mike，多年前買自深圳歡樂谷，最初Winnie並無對佢特別重視，但係七、八年前又忽然間好鍾意佢，一直到而家，愈來愈鍾意。我亦受到影響，比呢位小朋友迷住，基本上，我地真係當佢係仔。六年黎，Mike陪我地行過好多路，無論開心唔開心，佢都同我地一齊渡過，就連旅行都同埋我地一齊去。Mike已經係我地生活上不可缺少嘅一部份，係我地呢段感情必要嘅原素。

四、五年前，我地曾經特登去歡樂谷，為嘅就係睇下而家仲有無Mike嘅同類賣，結果當然無咁美好，無得買，但係既然當年曾經大量出售，廣東香港澳門一帶應該仲有唔少人買過呢款公仔，只係我地見唔到、搵唔見。點知今日，Winnie上網時，竟然意外喺周柏豪嘅blog見到呢款公仔嘅相...





呢對生得幾乎一模一樣嘅小朋友，除左個樣一個純d、一個忟d之外，其他完全一樣，眼耳口鼻以至手腳，甚至個身嘅質地，完全相同。或者當年周柏豪都曾經去過歡樂谷，買過同一款公仔，而且同我地一樣，都非常愛錫佢。如果有機會，我一定要親身問問佢，甚至帶Mike去比佢睇下。

外人睇黎，可能覺得一個大男人鍾意毛公仔好核突，但係有d野就係咁得意，而且愛呢樣野好難講，加上你將一d感情投射左入去，個樣野就會變得更加靚、更加重要。

可能你仍然覺得奇怪，但係我真係好鍾意我個仔。

阿漆

好多電影入面嘅場景都會成為影迷嘅朝聖之地，好似Before Sunset入面男女主角重遇後傾計個間cafe；情書入面嘅小樽市等等，都吸引大批遊客特登到當地感受下電影入面嘅情懷。

除左場景，戲內主角用過嘅物品、道具，好多時都會有影迷走去買黎儲，不過，我點都估唔到，竟然有人搵到呢一樣野...



就係凌凌漆用黎分散注意力個餅鹹帶。原來呢套猛片叫Educating Mandy，係1985年嘅作品，仲有個好詩意嘅中文戲名叫<春潮爛漫海棠紅>。

咩人咁勁搵到？咪又係祖國同胞囉。

毒癮發作

見到東方今日個頭條,我只想講句...

新朋友

我一向不好杯中物，但近排屋企多左位新朋友，深深吸引住我。

呢位仁兄叫Macallan，係老豆d同事送比佢嘅退休禮物。佢身材高，身穿一件深藍色外套，入面係修長嘅身軀，泛黃嘅液體喺樽入面流動，令我忽然有種想佔有佢嘅衝動。

眼見個個飲Whisky都加冰，我亦有樣學樣。冰塊喺杯入面滾動嘅聲音非常好聽，為呢個寧靜嘅冬夜帶來一d驚喜。酒由樽內傾瀉而出，辛烈嘅氣味令我精神一陣。輕輕一口，只感覺到一股暖流由喉嚨慢慢落到肚，漸漸有股熱力聚集喺肚入面，非常溫暖，同佢冰冷嘅外表完全相反。

借助呢股熱力，思路慢慢清晰，頭先諗唔到點寫嘅essay，忽然出現頭緒。

我望住手上嘅呢杯野，開始明白，點解會有咁多人鍾意佢。