強國

我諗世界上再無第二個國家可以咁樣，翻版不特止，仲翻到有板有眼。話說佛山媒體最近發現，市內有大量翻版企業、商店，當中以下呢間，都可以話係表表者。



你有肯德基，大陸有肯德利，仲夠膽死開正喺你對面。既然外表抄得，裡面當然一樣照抄可也，睇睇佢個廣告，除左個隻原隻大雞外，食物基本上同肯德基無分別，仲有Winnie the pooh精品換，不過真定假就唔知。



呢間KDL連老麥最新出嘅蝦堡都唔放過，推出佢地嘅七蝦堡，仲有My Melody送。



如果唔開心，不妨返大陸行返轉，應該好易會開心返。

真愛

寒冷天氣，令我地更容易諗起摯愛，但現今社會千變萬化，就連戀愛關係都一樣，所以真心長久嘅愛情就更加珍貴。

記得小學時候，曾經盛傳校內一位年輕女老師同一個師兄「有路」，係，你無睇錯我亦無寫錯，的確係小學。我並唔認識個位師兄，只係間中由同學口中得知係邊個，喺學校見過一兩次，而嗰位師兄亦好快畢左業。至於女老師，雖然無教過我，但因為佢同我住同一座大廈，所以對佢都有d印象。對於佢地嘅關係，我一直無一個確實嘅答案，亦無刻意去考究。

估唔到，今晚，我竟然意外地搵到答案。

巴士車廂中，我同Winnie有講有笑，忽然，一個剛剛上車嘅女人引起我嘅注意，睇真d，正正就係當年嗰位女老師，再睇真，原來行佢前面有個男人，只見個男人行過一排兩人座位，轉身，先讓女老師坐埋面座位，然後自己再坐外面座位。我定神一睇，就係嗰位師兄。我非常驚訝，估唔到竟然喺一個咁偶然嘅情況下見到佢地，仲解答埋當年嘅問題。我將呢件事講比Winnie聽，身為準教師嘅佢感受更大，同時亦覺得好難以置信，的確，小學生同老師，點能夠想像？當然，可能當年個師兄只係鍾意老師，老師亦一直無接受佢，直至師兄中學畢業，先至真係走埋一齊。

其實佢地點樣走埋一齊，已經唔重要。真愛難求，為世所不容嘅真愛就更加難得，十幾年過去，佢地唔需要再去証實d咩，一個眼神，一個關懷，已經足以反駁世間一切論調。見到佢地，我個心真係熱一熱，我亦諗起灘叔講佢讀書個陣「男教師女校花」嘅故事，我終於明白，灘叔點解會覺得開心，因為，我都有相同感覺。

商人治港 教育爆缸

其實，每次見到阿孫先生講野，我都唔係好get到佢想講咩，一來係佢有少少痴脷筋，二來係因為佢個副愛理不理嘅態度。

剛剛鏗鏘集講教育，又見到孫生出現。節目中所見，孫生話因為要慳九億出黎去做教改，所以要殺校，因為九億就係由殺校所慳而得到。之後無論其他議員點樣講佢點樣插佢，佢都係愛理不理，講黎講去三幅被。睇到呢度，我忽然覺得，自從回歸之後，香港學生/學校/老師好似比政府玩完一次又一次咁，先有母語教學，一項因為要擦大陸鞋而推行嘅政策，結果令到學生英語水平愈來愈差，我自己就曾經先後受過英語同母語教學，我好肯定受英語教學嗰幾年係我學英文最多嘅時間，今時今日嘅基礎都係當時打定。有人會話英語教學會令學生中文水準差，咁點解以前出產嘅本土作家多過而家咁多？黃霑、林夕、王貽興以前讀咩中學？其實咪又係藉口。再講，你地班高官如果真係對香港母語教學咁有信心，即管叫你地d仔女唔好讀國際學校、唔好去外國讀書，全部留港學習，去北京上海讀大學。

講返殺校，呢個政府真係用臀部諗野，因為要慳九億而攪到學生、學校同家長都雞毛鴨血，九億對香港黎講算咩？教改變334，咪又係跟大陸，你抬上四川重建都幾十億，要九億黎培育香港未來新一代都唔得？孫生連教育都用商業眼光去睇，下下講資源，我仲點對香港教育有信心？

果然商人，傷人。

教育係極其重要嘅項目，今日中國人有錢但失禮，全因為教育不足，當全世界都將教育投放維持、甚至提高時，香港竟然因為一d數據同資料去決定殺校，而唔理教學質素，咁香港仲算唔算一個文明社會？

寄語我所認識嘅教院朋友，希望你地好好努力，唔好輕言放棄，更加唔好比其他人有藉口話你地唔掂，我相信有心從事教育嘅人都係好人。教育比你地想像中更偉大，唔好睇小自己，因為你地有同阿里士多德、柏拉圖、蘇格拉底一樣嘅信念，就算唔信自己，都要信呢幾個遠古天才。

有線與無線

香港影視娛樂事業雖然已經大不如前，但總會不斷有新野推出，希望刺激一下沉靜嘅市場。我好欣賞呢班肯出錢嘅人，先唔講佢地係咪為賺錢，起碼肯資助，已經令電影、音樂、電視等可以有更多機會，去創作一d新野比我地去享受。

不過，我愈來愈覺得有d編劇、導演、老闆等等根本唔知觀眾想要咩，有d太hea，有d太公式化，有d甚至老土...

無錯，我係話緊你。

阿徐小明先生，我真係覺得你部戲好x煩，我呢排已經唔敢打開有線個解碼器，可唔可以放過我？你宣傳唔係問題，但係點解我連睇新聞台同體育台都見到你套戲d廣告？又成日無端端整個特備節目黎講自己點拍點寫，你醒下喇，咩「全城奪標」，無cable個d鬼知套戲d女角係邊個咩？劇情又舊，而家連大陸d影評都覺得老土，唔好呃自己喇，搵鬼睇咩，之前<<雙子神偷>>同劉華套<<三國>>之後你仲未知死？

順帶一講，TVB個咩頒獎典禮，唔該又係唔好攪到全港都關注咁，至少有我唔會理，自己頒比自己，咁同學校放喺禮堂門口d獎杯有咩分別？「視帝」呢個名真係好核突呀，不如拍爛擋，寫返好d劇本先喇。

權謀

好一個陳水扁！明明已經名譽掃地，成家都面臨牢獄之災，竟然仲可以轉移視線，將自己洗錢貪污嘅事推開，連過大陸同馬英九兩棟，更將自己形容為國共再次合作之下嘅犧牲品，更甚者，仲成功令一班die hard民進黨人幫佢攪事。

論人氣，外表出眾嘅馬英九當然大勝陳水扁，但論政治權謀，馬英九就完全唔係陳水扁對手，由當初所謂中鎗事件，到今日嘅轉移視線，都充分反映阿扁嘅政治智慧。當然，仲要多得一班被陳水扁玩到氹氹轉嘅綠營支持者，無佢地咁熱烈支持，陳水扁講咩都無用。

始終，咩人民就有咩政府，所以有時我地都唔應該怪特區政府太多。

物以類聚。

愛爾蘭投石機

蘋果cg改圖一向厲害，呢張真係無得頂！

禾確特...好傳神！笑到肚痛...

話時話，除左戴納擲界外球個陣搵人企喺佢前面之外，仲有無方法防？